छत्तीसगढ़ राजभाषा आयोग के जिला स्तरीय सम्मेलन के आयोजन होइस

            छत्तीसगढ़ राजभाषा आयोग डहर ले अउ प. मुकुटधर साहित्य समिति के सहयोग ले पं. जवाहरलाल नेहरू ऑडिटोरियम म जिला स्तरीय सम्मेलन के अब्बड़ सुग्घर कार्यक्रम आयोजित होइस। ए कार्यक्रम के शुरुवात पहुना मन के माँ सरसती अउ छत्तीसगढ़ महतारी के फोटो आघु दीया जलाय पूजा-पाठ ले होइस। राजभाषा आयोग के सचिव डॉ. अभिलाषा बेहार जी माँ सरसती के सुग्घर वंदना प्रस्तुत करीन। माटी महतारी ल माथ नवात छत्तीसगढ़ राजगीत के प्रस्तुति संतोषी महंत 'श्रद्धा' अउ घनश्याम श्रीवास जी दिहीन।

       माई पहुना के रूप म कार्यक्रम के अध्यक्षता मंत्री लखन लाल देवांगन जी करीन। खास पहुना के रूप म कोरबा के महापौर संजू देवी सिंह राजपूत, सभापति नूतन सिंह ठाकुर, जिला पंचायत अध्यक्ष डॉ. पवन सिंह, जिला पंचायत सीईओ दिनेश नाग, पार्षद नरेंद्र देवांगन जी सहित अउ पहुना मन घलोक मंच म विराजमान रहीन। 

        जम्मों पहुना मन के फूलमाला अउ बैज लगाके स्वागत अभिनन्दन करे गिस। पहुनाई करत आयोग के सचिव डॉ. अभिलाषा बेहार अउ जिला संयोजक दिलीप अग्रवाल जी के द्वारा छत्तीसगढ़ के पारंपरिक ताज 'खुमरी' पहिरा के पहुना मन के स्वागत अभिनन्दन करे गिस। स्वागत म 'जय बूढ़ादेव करमा नाचा दल' अउ 'सैंडी डांस अकेडमी' के लइका मन के द्वारा मनमोहक सांस्कृतिक प्रस्तुति ह सबके मन ल मोह डारिस। हम सबला नाचा के माध्यम ले हमर सुग्घर संस्कृति, संस्कार अउ पारम्परिक लोकगीत के झलक देखे बर मिलीस। 

        स्वागत उद्बोधन आयोग के सचिव डॉ. अभिलाषा बेहार जी प्रस्तुत करीन। राजभाषा आयोग के अध्यक्ष प्रभात मिश्रा जी ह अपन संबोधन म कहिन कि हम सबला छत्तीसगढ़ी ल संविधान के आठवीं अनुसूची म शामिल कराय बर जी जान ले काम करना हे। अउ बताइन की हमर महतारी भाखा ल पोठ करे बर, आठवीं अनुसूची म शामिल कराय बर आयोग ह घलो हर संभव प्रयास करत हे। माई पहुना लखन लाल देवांगन जी ह बड़ बढ़िया अउ सफल आयोजन बर संयोजक मन ल अउ आयोग ल बधाई देवत छत्तीसगढ़ी भाखा अउ संस्कृति के बारे म घलो बताइन की कइसे महतारी भाखा ह जम्मों ल जोड़ के राखथे। ये महतारी भाखा के बढ़वार बड़ जरूरी आय।

     समारोह म कोरबा के वरिष्ठ कवि उमेश अग्रवाल अउ दीप दुर्गवी जी ल साहित्य के क्षेत्र म उँखर अनमोल योगदान बर प्रशस्ति पत्र, साल, श्रीफल संग चिन्हारी म मोमेंटो भेंट करके सम्मानित करे गिस। संगे संग पं. मुकुटधर पांडेय जी परिवार के हनी तिवारी जी ल घलो उँखर कला के क्षेत्र म योगदान बर सम्मानित करे गिस। उँखर बाद अंचल के विख्यात साहित्यकार डॉ. गिरिजा शर्मा, डोरेलाल कैवर्त, रामकली कारे एवं संतोष मिरी 'हेम' के प्रकाशित पुस्तक मन के लोकार्पण घलोक होइस। 

    कार्यक्रम म छायावाद के जनक प. मुकुट धर पाण्डेय जी, अउ कोरबा के साहित्यकार भागवत प्रसाद कश्यप जी के साहित्य उपर बड़ बढ़िया चर्चा गोष्ठी आ.आशा देशमुख, आशा आजाद, घनश्याम श्रीवास अउ तिलोत्तमा पांडे जी मन प्रस्तुत करीन। कार्यक्रम के पहिली पारी के सुघर संचालन डॉ कृष्ण कुमार चंद्रा जी द्वारा करे गिस। 

       दूसर पारी म कवि सम्मेलन के संचालन जीतेंद्र वर्मा 'खैरझीटिया' जी, रसीदा बानो जी करीन। ये सम्मेलन म छत्तीसगढ़ राज के रायगढ़, मुंगेली, बिलासपुर, रायपुर अउ बड़ अकन जिला के साहित्यकार मन घलो उपस्थित रहीन। कवि सम्मेलन म छत्तीसगढ़ी म एक ले बढ़के एक लोकगीत, ददरिया, कविता, गीत, गजल, के प्रस्तुति ले सबके अंतस गदगद होगे। 

    छत्तीसगढ़ी के बढ़वार, चिन्हार बर साहित्यिक, सांस्कृतिक कार्यक्रम के संगे संग ए कार्यक्रम म छत्तीसगढ़ी भाखा के पुस्तक प्रदर्शिनी घलो लगे रहीस। जेमा छत्तीसगढ़ी भाखा ल पोठ करे बर एक ले एक सुग्घर-सुग्घर छत्तीसगढ़ी म लिखाय पुस्तक के प्रदर्शिनी छत्तीसगढ़ राजभाषा आयोग अउ प. मुकुटधर पाण्डेय साहित्य समिति के सहयोग ल करे गए रहीस। 

    जम्मों पहुना मन ल आयोग द्वारा चिन्हारी भेंट करके सम्मानित करे गिस। शानदार कार्यक्रम बर छत्तीसगढ़ राजभाषा आयोग अउ माई पहुना संगे संग जम्मों साहित्यकार मन प. मुकुटधर साहित्य समिति कोरबा के शानदार आयोजन के बढ़ई करीन। जिला समन्वयक दिलीप अग्रवाल, मुकेश चतुर्वेदी, प. मुकुटधर समिति सचिव डॉ. कृष्ण कुमार चंद्रा जी, उपाध्यक्ष बलराम राठौर, कोषाध्यक्ष जीतेंद्र वर्मा, संरक्षकगण युनूस दानियालपुरी, कमलेश यादव सहित जम्मों साहित्यकार मन के कार्यक्रम म मुख्य भूमिका रिहिस। सियान मन के संगे संग युवा वर्ग के साहित्यकार मन घलो ये साहित्य के यज्ञ म शामिल होके बड़ चढ़के भूमिका निभाईन।

महतारी भाखा के बढ़वार बर।

पुरखा के सुरता अउ सत्कार बर।

जुरियाय रहेंन हमन कोरबा मा,

छत्तीसगढ़ी के सुघर चिन्हार बर।

*लोको पायलट-संतोष मिरी 'हेम'*

     कोरबा (छत्तीसगढ़)

 🌾🌾🌾🌾🌾🌾🌾🌾🌾🌾🌾 

************************************