अँचरा के जुड़ छाँव* (मनहरण घनाक्षरी)

अँचरा के जुड़ छाँव,

झन जरे मोर पाँव,

तोला छोड़ कहाँ जाँव,

     मया बड़ा भारी हे।

💫🤱💐

बिहना उठाये मोला,

संग म खवाये मोला,

बने पहिराए मोला,

       मोर महतारी हे।

💫👩‍👦💐

मन म सहेजे मोला,

पढ़े लिखे भेजे मोला,

जाने तैं करेजा मोला,

  मया के चिन्हारी हे।

💫🤱💐

जब ददा ह जंगाये,

दाई तहिं ह बचाये,

मोला रेंगना सिखाये,

   मोरो तो पुछारी हे।

            -०-

साहित्य,समाज एवं कृषि सेवा

©®

    कुमार🙏🏼कारनिक

            "कुमार"

   (छत्तीसगढ़, भारत)

 *****